NAZM....NAYA SAAL NAYE SAPNE
Har saal naye saal se karta hun ummeeden
har saal yehi soch ke bharta hun naye rang
is saal to har khwab ko tabeer milegi
is saal to ehsas ko tanveer milegi
is saal to chat jayenge zakhmon ke andhere
is saal to ubhrenge ummeedon ke savere
is saal to khushiyon ke naye phool khilenge
is saal to bichre hue sab log milenge
is saal na ujregi mere desh ki dharti
is saal na tootegi fasadat ki bijli
har fasle har dooriyan mit jayengi is saal
tareekiyan nafrat ki simat jayengi is saal
is saal kisi aankh me aansoo na rahega
is saal to sarhad pe kahin khoon na bahega
is saal andhere me rahega na koi ghar
be chat ke na reh payega is saal koi sar
bekar hain jo log unhen kam milega
is saal to insaan ko aaram milega
dharti pe na reh payega bhooka koi is saal
roti ke liye hoga na jhagra koi is saal
is saal kahin desh me sookha na parega
is saal kahin bhi koi bhooka na rahega
duniya me kahin zulm ki aandhi na chalegi
is saal kahin bhi koi basti na jalegi
is saal to baton ko naye rang milenge
is saal to jeene ke naye dhang milenge
ek aman ka paigham bhi layega naya saal
insan ko insaan banayega naya saal
is saal to aayegi ummeedon ki diwali
is saal na jayega kisi dar pe sawali
is saal to holi me naye rang ghulenge
is saal to bhai se gale bhai milenge
aatank ke chayenge na is saal andhere
is saal to cha jayenge khushiyon ke savere
is baar jo ubhrega naye saal ka suraj
har dukh ko bhula dega naye saal ka suraj
yeh sochte hi sochte kat jata hai ek saal
phir ret sa hathon se phisal jata hai ek saal
yeh saal bhi kho jayega maazi ke bhanwar me
yeh saal bhi kat jayega sapno ke safar me
PHIR SAAL KI AAMAD PE NAYE KHWAB BUNENGE
PHIR SAAL KI AAMAD PE NAYE GEET LIKHENGE
***akhtar rizvi
